మత్తు నిద్ర వీడి కాలుష్యంపై ప్రభుత్వం వెంటనే స్పందించాలి: ఏనుగు సుదర్శన్ రెడ్డి

హైదరాబాద్ నగర చెత్తను మెద్చల్–మల్కాజిగిరి జిల్లాకు తరలించడం వల్ల ప్రజారోగ్యం, రైతుల జీవనోపాధిపై ప్రభావం పడుతోందని బీజేపీ నేత ఏనుగు సుదర్శన్ రెడ్డి విమర్శించారు. జవహర్‌నగర్ డంపింగ్ యార్డు, చెర్లపల్లి పారిశ్రామిక ప్రాంతం చుట్టూ కాలుష్యంపై సమగ్ర శాస్త్రీయ పరీక్షలు నిర్వహించాలని ఆయన డిమాండ్ చేశారు.

నీరు, గాలి, నేలపై శాస్త్రీయ పరీక్షలు చేయాలి

దమ్మాయిగూడ, నాగారం, కీసర, ఘట్‌కేసర్, ఎడులాబాద్ ప్రాంతాల్లో నీరు, గాలి, నేల కాలుష్యంపై తక్షణమే పరీక్షలు నిర్వహించాలని సుదర్శన్ రెడ్డి కోరారు. నీరు, గాలి, నేలతో పాటు పంటలు, పాలు, చేపల నమూనాలను సేకరించి పరీక్షలు నిర్వహించాలని, కాలుష్య నియంత్రణ మండలి నివేదికను ప్రజలకు అందుబాటులో ఉంచాలని డిమాండ్ చేశారు.

రైతులు, మత్స్యకారుల ఆందోళనలను పట్టించుకోవాలి

పంటలు దెబ్బతింటున్నాయని రైతులు, చేపలు చనిపోతున్నాయని మత్స్యకారులు చెబుతున్నారని ఆయన పేర్కొన్నారు. పాడి పశువులు, కూరగాయలు, నీటి నాణ్యతపై ప్రజల్లో ఉన్న ఆందోళనలను ప్రభుత్వం పరిష్కరించాలని కోరారు.

“ప్రజల ప్రాణాల కంటే రాజకీయాలు గొప్పవి కావు. విషపు నీటిపై వెంటనే సమగ్ర విచారణ జరిపి కాలుష్యానికి అడ్డుకట్ట వేయాలి. ప్రజల ఆరోగ్యానికి ప్రభుత్వం బాధ్యత వహించాలి”

మల్లారెడ్డి సమాధానం చెప్పాలని డిమాండ్

ఈ సమస్యపై మాజీ మంత్రి, స్థానిక ఎమ్మెల్యే మల్లారెడ్డి సమాధానం చెప్పాలని సుదర్శన్ రెడ్డి డిమాండ్ చేశారు. ప్రజల జీవన ప్రమాణాలను దృష్టిలో పెట్టుకుని జిల్లాను అభివృద్ధి చేయాలని, రాజకీయ అవసరాలకు అనుగుణంగా కాకుండా ప్రజల నాణ్యమైన జీవనానికి ప్రాధాన్యత ఇవ్వాలని సీఎం‌ను కోరారు.

ప్రభుత్వం స్పందించకపోతే పాదయాత్ర

కాలుష్య సమస్యపై ప్రభుత్వం స్పందించకపోతే ఎడులాబాద్ నుంచి జవహర్‌నగర్ డంపింగ్ యార్డు వరకు పాదయాత్ర చేపడతామని ఏనుగు సుదర్శన్ రెడ్డి హెచ్చరించారు. ప్రజారోగ్యం, రైతులు, మత్స్యకారుల సమస్యలపై ప్రభుత్వం వెంటనే స్పందించాలని ఆయన కోరారు.

ఈ కార్యక్రమంలో పార్టీ నాయకులు, కార్యకర్తలు పాల్గొన్నారు.