రాంపల్లిలో చెత్త కుప్పలు.. పారిశుధ్యంపై స్థానికుల ఆందోళన

మూడు నెలలుగా చెత్త తరలింపు నిలిచిందని ఆరోపణలు.. సమస్య పరిష్కరించకపోతే ఆందోళనకు దిగుతామని మాజీ ప్రజాప్రతినిధుల హెచ్చరిక

రాంపల్లి: మేడ్చల్–మల్కాజిగిరి పరిధిలోని రాంపల్లి గ్రామంలో చెత్త కుప్పలు పేరుకుపోతున్నాయని, దీంతో స్థానిక ప్రజలు తీవ్ర ఇబ్బందులు ఎదుర్కొంటున్నారని నాగారం మున్సిపాలిటీ మాజీ చైర్మన్ చంద్రారెడ్డి, మాజీ కౌన్సిలర్ శ్రీనివాస్ గౌడ్ ఆందోళన వ్యక్తం చేశారు.

వారి వివరాల ప్రకారం.. రాంపల్లి ప్రాంతంలో సేకరించిన చెత్తను తరలించాల్సిన రాంకీ సంస్థ గత మూడు నెలలుగా లిఫ్టింగ్ ప్రక్రియను నిలిపివేసిందని ఆరోపించారు. దీంతో గ్రామంలో సేకరించిన వ్యర్థాలను కొన్ని చెత్త సేకరణ ఆటోలు స్థానికంగానే డంప్ చేస్తున్నాయని వారు పేర్కొన్నారు.

చెత్త కుప్పలతో దుర్వాసన

చెత్తను ఎప్పటికప్పుడు తరలించకపోవడంతో రాంపల్లిలో పలు ప్రాంతాల్లో వ్యర్థాలు పేరుకుపోతున్నాయని నాయకులు తెలిపారు. వర్షాలు, ఎండల ప్రభావంతో చెత్త కుళ్లిపోవడంతో దుర్వాసన వస్తోందని, దోమలు, ఈగల సమస్య కూడా పెరుగుతోందని స్థానికులు ఆవేదన వ్యక్తం చేస్తున్నట్లు తెలిపారు.

పారిశుధ్య సమస్యను వెంటనే పరిష్కరించకపోతే రాంపల్లి కూడా పెద్ద డంపింగ్ ప్రాంతంగా మారే పరిస్థితి ఏర్పడుతుందని స్థానికులు ఆందోళన వ్యక్తం చేస్తున్నారని చెప్పారు.

చెత్తను వెంటనే తొలగించాలని డిమాండ్

ఈ సందర్భంగా చంద్రారెడ్డి, శ్రీనివాస్ గౌడ్ మాట్లాడుతూ.. మూడు నెలలుగా సమస్య కొనసాగుతున్నప్పటికీ సంబంధిత అధికారులు, మున్సిపల్ యంత్రాంగం తగిన చర్యలు తీసుకోవడం లేదని ఆరోపించారు. రాంకీ సంస్థ చెత్త లిఫ్టింగ్ ఎందుకు నిలిపివేసిందనే అంశంపై అధికారులు స్పందించి, సమస్యకు పరిష్కారం చూపాలని డిమాండ్ చేశారు.

పేరుకుపోయిన చెత్తను పూర్తిగా తొలగించడంతో పాటు ఆయా ప్రాంతాల్లో బ్లీచింగ్, ఇతర పారిశుధ్య చర్యలు చేపట్టాలని కోరారు. గ్రామంలో పారిశుధ్య పరిస్థితులను మెరుగుపరిచి ప్రజలకు ఇబ్బందులు లేకుండా చూడాలని విజ్ఞప్తి చేశారు.

స్పందించకపోతే ఆందోళన

సమస్యపై అధికారులు వెంటనే స్పందించి శాశ్వత పరిష్కారం చూపకపోతే స్థానిక ప్రజలతో కలిసి ఆందోళన కార్యక్రమాలు చేపడతామని చంద్రారెడ్డి, శ్రీనివాస్ గౌడ్ హెచ్చరించారు.

MMC కార్యాలయం, ఘట్కేసర్ ప్రాంతంతో పాటు ప్రధాన రహదారులపై భారీ ఎత్తున ధర్నాలు నిర్వహించాల్సి వస్తుందని వారు తెలిపారు. చెత్త తరలింపు, పారిశుధ్య సమస్యపై సంబంధిత అధికారులు తక్షణమే చర్యలు తీసుకోవాలని వారు డిమాండ్ చేశారు.