పాలకుర్తి: జనగామ జిల్లా పాలకుర్తి మండల కేంద్రంలోని తెలంగాణ సాంఘిక సంక్షేమ బాలికల గురుకుల పాఠశాలలో మంగళవారం రాత్రి 14 మంది విద్యార్థినులను ఎలుకలు కరిచిన ఘటన ఆలస్యంగా వెలుగులోకి వచ్చింది.

నిద్రిస్తున్న విద్యార్థినులను ఎలుకలు కొరుకడంతో వారు ఒక్కసారిగా భయాందోళనకు గురయ్యారు. చేతులు, కాళ్లపై ఎలుకలు కరవడంతో పలువురు విద్యార్థినులు అస్వస్థతకు గురయ్యారు. విషయం తెలుసుకున్న పాఠశాల సిబ్బంది వెంటనే స్పందించి, బాధిత విద్యార్థినులను బుధవారం మండల కేంద్రంలోని ప్రభుత్వ దవాఖానకు తరలించి చికిత్స అందించారు.

ప్రభుత్వ దవాఖాన సూపరింటెండెంట్ డాక్టర్ వనం శ్రీనివాస్ మాట్లాడుతూ, మొత్తం 14 మంది విద్యార్థినులకు ఆసుపత్రిలో చికిత్స అందించినట్లు తెలిపారు.

తల్లిదండ్రులకు సమాచారం ఇవ్వలేదని విమర్శలు

ఈ విషయం బయటకు రాకుండా పాఠశాల సిబ్బంది, యాజమాన్యం తగు జాగ్రత్తలు తీసుకున్నట్లు తెలిసింది. తల్లిదండ్రులకు సమాచారం ఇవ్వకపోవడంపై తీవ్ర విమర్శలు వెల్లువెత్తుతున్నాయి.

ఎర్రబెల్లి దయాకర్‌రావు నిరసన

ఈ ఘటనపై మాజీ మంత్రి, బీఆర్ఎస్ నాయకుడు ఎర్రబెల్లి దయాకర్‌రావు స్పందించారు. విద్యార్థినులను పరామర్శించేందుకు గురుకుల పాఠశాలకు వెళ్లిన ఆయనను పోలీసులు గేటు వద్ద అడ్డుకున్నారు. దీంతో ఆయన పాఠశాల గేటు ఎదుట బీఆర్ఎస్ మండల నాయకులతో కలిసి నిరసనకు దిగారు.

ఈ సందర్భంగా ఎర్రబెల్లి మాట్లాడుతూ, ప్రభుత్వ గురుకులాలు, హాస్టళ్లలో విద్యార్థులకు కనీస వసతులు కల్పించాల్సిన బాధ్యత అధికారులపై ఉందని అన్నారు. 14 మంది విద్యార్థినులకు ఎలుకలు కరిచినట్లు సమాచారం వస్తే అధికారులు, సిబ్బంది ఏం చేస్తున్నారని ప్రశ్నించారు. విద్యార్థినులను పరామర్శించి వారికి ధైర్యం చెప్పేందుకు వచ్చిన తనను పాఠశాలలోకి అనుమతించకపోవడం సరికాదని ఆయన అన్నారు. విద్యార్థినుల తల్లిదండ్రులకు ఘటనపై సమాచారం అందించారా లేదా అనే విషయాన్ని అధికారులు స్పష్టం చేయాలని కోరారు.

నివారణ చర్యలపై స్పష్టత లేదు

ఎలుకల కాటు ఘటనకు సంబంధించి విద్యార్థినుల పరిస్థితి, వైద్య చికిత్స, పాఠశాలలో తీసుకున్న నివారణ చర్యలపై అధికారికంగా పూర్తి వివరాలు తెలియాల్సి ఉంది. గురుకుల పాఠశాలలో ఎలుకల బెడద ఉన్నప్పటికీ తగిన చర్యలు తీసుకోకపోవడం వల్లే ఈ ఘటన జరిగిందా అనే ప్రశ్నలు తలెత్తుతున్నాయి. ఎలుకల నివారణకు అధికారులు తక్షణ చర్యలు తీసుకోవాలని విద్యార్థినుల తల్లిదండ్రులు కోరుతున్నారు.