హనుమాస్కుంట చెరువు అభివృద్ధికి చర్యలు తీసుకోవాలి: హైడ్రా కమిషనర్‌కు వినతి

మల్కాజ్‌గిరి: మల్కాజ్‌గిరి మున్సిపల్ కార్పొరేషన్ పరిధిలోని చెంగిచెర్ల డివిజన్‌లో ఉన్న హనుమాస్కుంట చెరువు అభివృద్ధి, పరిరక్షణకు చర్యలు చేపట్టాలని కోరుతూ డీసీసీ అధ్యక్షులు, మేడ్చల్ నియోజకవర్గం కాంగ్రెస్ ఇన్‌చార్జ్ తోటకూర వజ్రెష్ యాదవ్ హైడ్రా కమిషనర్‌ను కలిసి వినతిపత్రం అందజేశారు.

హనుమాస్కుంట చెరువు స్థానిక ప్రజలకు ఎంతో ప్రాధాన్యత కలిగిన జలవనరు అని వజ్రెష్ యాదవ్ పేర్కొన్నారు. చెరువు అభివృద్ధితో పాటు పరిసర ప్రాంతాల సుందరీకరణ, కాలుష్య నివారణ, నీటి నిల్వ సామర్థ్యాన్ని పెంచేలా చర్యలు చేపట్టాలని హైడ్రా అధికారులను కోరారు.

చెరువు పరిధిలో ఆక్రమణలు, మురుగునీటి సమస్యలు ఉంటే వాటిని పరిశీలించి పరిష్కరించాలని విజ్ఞప్తి చేశారు. చెరువును సమగ్రంగా అభివృద్ధి చేసి ప్రజలకు ఆహ్లాదకరమైన వాతావరణం కల్పించేలా చర్యలు తీసుకోవాలని కోరారు.

ప్రజల అవసరాలను దృష్టిలో ఉంచుకుని హనుమాస్కుంట చెరువు అభివృద్ధికి అవసరమైన చర్యలు చేపట్టాలని వజ్రెష్ యాదవ్ హైడ్రా అధికారులను కోరినట్లు తెలిపారు.

ఈ కార్యక్రమంలో మాజీ కార్పొరేటర్ సింగిరెడ్డి పద్మా రెడ్డి, పుల్లకండ్ల జంగారెడ్డి, పుల్లకండ్ల వెంకట్ రెడ్డి, పుల్లకండ్ల రాజి రెడ్డి, సింగిరెడ్డి రాజు రెడ్డి తదితరులు పాల్గొన్నారు.